Seun vas vir dronkbestuur ná rit op grassnyer
2011-07-08 12:20
Brittanje – ‘n Britse tiener is verbied om te bestuur nadat hy onder die invloed van alkohol agter die stuur van sy pa se grassnyer ingeklim het.
Joel Maunder (18) het in Junie sy pa se grassnyer, wat teen 25 km/h kan ry, by sy ouerhuis in die suide van Wallis geneem om sy vriende te besoek.
Hy het egter minder as 2 km ver gery toe hy deur die polisie van die pad afgetrek is. Sy bloedalkoholvlak was twee keer meer as die wettige perk.
Maunder, wat tans in sy finale jaar op skool is, is aanvanklik daarvan aangekla dat hy in die besit van ‘n meganies aangedrewe voertuig was terwyl hy onder die invloed van alkohol was.
Staatsaanklaers het egter aangevoer dat hy van dronkbestuur aangekla moet word omdat die grassnyer waarmee hy gery het 'n brandstof-enjin het.
Maunder is verlede week deur die hof verbied om vir 17 maande te bestuur en moet ‘n boete van £100 (sowat R1100) betaal.
Die landdros het gesê sy vonnis kan met vier maande verminder word indien hy ‘n bestuurskursus in ‘n motor voltooi.
– Daily Mail.
– Volg Nuus24 op Twitter.