Regering onttrek omstrede bandeplan
2012-01-26 07:01
Kaapstad. - Die regering se plan met afvalbande, Redisa, het Woensdag pap wiele gekry toe die departement van omgewingsake besluit het om die omstrede plan vir eers te onttrek.
Collins Chabane, waarnemende minister van omgewingsake en waterwese, het Woensdag in die Staatskoerant afgekondig die departement het sy goedkeuring van die Redisa-plan met onmiddellike effek gekanselleer.
Die Burger het Woensdag berig oor dié omstrede plan wat by die agterdeur ingeglip en die groen lig ontvang het sonder dat die Suid-Afrikaanse bandebedryf in die saak geken is.
Redisa, ’n onafhanklike Artikel 21-maatskappy, sou van 1 Februarie af volle verantwoordelikheid vir alle afvalbande in Suid-Afrika neem.
Dit is ’n onderneming wat tot R630 miljoen per jaar werd is en sou gefinansier word deur ’n heffing vanaf 1 Februarie van R2,30/kg op alle nuwe bande wat verkoop word.
Tot 85% van die bandebedryf steun daarteenoor ’n herwinningsplan wat die South African Tyre Recycling Process Company (SATRC) namens die bedryf ontwikkel het.
Die bedryf het die SATRC 12 jaar gelede gestig op versoek van die regering wat ’n bandherwinningsprojek wou ontwikkel aangesien tot 11 miljoen afvalbande jaarliks in Suid-Afrika onwettig gestort word.
Die regering het dié plan egter verlede jaar op omstrede wyse verwerp ten gunste van Redisa.
Albi Modise, departementele woordvoerder, het Woensdag erken die Redisa-goedkeuring is gekanselleer omdat nie alle prosedures gevolg is nie.
“Ons weet nie hoe dit gebeur het dat daar nie konsultasie met die bedryf was nie, maar toe ons die fout agterkom, het ons vinnig beweeg om dit reg te stel.”
Modise sê die afkondiging in die Staatskoerant gee nou aan alle partye die geleentheid om hul eie herwinningsplanne weer voor te lê.
Hermann Erdmann, uitvoerende hoof van Redisa, het Woensdagaand gesê hy beskou die departement se besluit as ’n “tydelike terugslag”.
“Met die plan, soos hy staan, is niks fout nie. Ek verwag ons sal binne twee tot drie maande weer aan die gang wees.”
Dr. Etienne Human, hoof van die SATRC, sê dit is te vroeg om te sê hoe die regering se afkondiging die organisasie raak.
– Volg Nuus24 op Twitter
- Die Burger