Nuwe battery hupstoot vir elektriese motors

2012-06-13 20:57

VSA – ‘n Amerikaanse vervaardiger sê hy het ‘n nuwe motorbattery ontwikkel wat in ekstreme temperature kan werk en die koste van die vervaardiging van elektriese motors potensieel kan sny.

A123 Systems, wat in Massachusetts gebaseer is, het Dinsdag gesê sy Nanophosphate EXT sal “die behoefte vir verkoeling- of verhittingstelsels verminder of elimineer wat na verwagting baie nuwe geleenthede sal bied” vir motor en ander tipes batterye.

“Ons glo Nanophosphate EXT is ‘n deurbraak wat die grootste beperkinge van loodsuur, standaard litium-ioon en ander gevorderde batterye oorkom,” het David Vieau, die uitvoerende hoof van die maatskappy, gesê.

Volgens Vieau kan die nuwe batterytegnologie “die behoefte vir duur termiese bestuurstelsels verminder of selfs elimineer en ons verwag dit kan die saak vir litium-ioon-batterye in ‘n merkwaardige hoeveelheid toepassings verbeter,” het hy oor die nuwe batterytegnologie gesê.

Toetse het getoon die battery kan meer as 90% van sy aanvanklike kapasiteit op 45 grade celsius  behou en kan ook krag lewer op -30 grade celsius.

– Volg Nuus24 op Twitter
 

- AFP