Nommerplaat opgeveil vir meer as die prys van 'n motor
2012-02-13 18:42
Bangkok – ‘n Sakeman van Thailand het ‘n rekordbedrag van 11 miljoen baht (R2,67 miljoen) by ‘n staatsveiling betaal vir ‘n “gelukkige” en romantiese nommerplaat.
Prasakorn Sakonsattayathorn, wie se familie die eienaars van die vyfster Sukhothai Hotel is, het die bedrag Saterdag op die veiling aangebied vir die nommerplaat met die Thai-letters “Yor Ying Yor Ying” en die nommers “9999”.
Die direkteur van die departement van grondsake, Asdasathai Rattanadilok Na Phuket, wat die veiling gelei het, sê die 11 miljoen is “die hoogste aanbod in die geskiedenis en beloop meer as die prys van ‘n motor”.
Hy het gesê “Yor Ying” staan vir vrou, dus was die bod moontlik romanties gemotiveerd, aangesien dit Dinsdag Valentynsdag is.
Die nommer “9” word as ‘n gelukkige nommer gesien.
Asdasathai sê die departement verwag dat hy meer as 150 miljoen baht (R37 miljoen) uit die naweek se veiling van spesiale nommerplate gemaak het.
– Volg Nuus24 op Twitter
- Sapa-DPA