Nóg 'n Nano bars in vlamme uit
2011-09-29 09:20
Indië – Tata Motors in Indië het Maandag ‘n ondersoek van stapel gestuur nadat nóg een van hul Nano-luikrugmodelle aan die brand geslaan het.
Die motor het onder onverklaarbare omstandighede in vlamme uitgebars.
Die Nano, wat in 2008 as dié motor bekendgestel is wat ‘n omwenteling in die vervoer in Indië sal teweegbring, het swak verkoop weens veiligheidsprobleme en produksiefoute.
“’n Nano-voertuig het Sondag in Nieu-Delhi aan die brand geslaan. ‘n Span engineurs is na die toneel ontbied om ondersoek in te stel wat tot die brand gelei het. Die ondersoek sal nog tyd neem,” het Debasis Ray, woordvoerder van Tata Motors, aan die nuusagentskap AFP gesê.
Die maatskappy sal in kontak met die eienaar van die motor wees, het Ray gesê.
Die Times of India het berig twee broers het daarin geslaag om uit die voertuig te ontsnap nadat dit in vlamme uitgebars het.
Tata is verlede jaar genoop om verniet veiligheidsopgraderings te doen nadat verskeie Nano-voertuie in aparte voorvalle aan die brand geslaan het.
Tata hou egter vol dat die motor geen veiligheidsprobleme het nie.
Die goedkoopste Nano-model kos ongeveer $2 500 (sowat R20 000).
– Volg Nuus24 op Twitter.
- AFP