Net Japanse motors by skou
2009-10-22 10:00
Kaapstad - Die Tokio-motorskou gooi dié naweek sy deure vir die publiek oop, maar wat eens ’n teelaarde vir wêreldbekendstellings was, is vanjaar bloot ’n afgewaterde Japanse affêre.
Daar sal steeds konsepmodelle en koddige elektriese vuurwaens wees, soos ’n mens nou al van ’n Japanse motorskou verwag, maar al dié rygoed is van Japanse vervaardigers.
Geen groot Amerikaanse of Europese motorgroep het dit die moeite werd geag om vanjaar by die skou in Tokio vir die eerste keer ’n belangrike model aan die wêreldpubliek te wys nie.
Enersyds is dit ’n teken van die stram ekonomiese tye. Dit kos groot geld om by ’n motorskou uit te stal, as jy dit ordentlik wil doen. Daarom is die vervaardigers al meer kieskeurig. Detroit in Januarie, Genève in Maart en Frankfurt in September bied ’n lang lysie van billike alternatiewe wat boonop nader aan die huis is.
Maar daarby is die tanende belangstelling by die groot vervaardigers in Tokio ook ’n lakmoestoets vir die Japanse hoofstad se relevansie vir die wêreldmark.
As jy wel in Asië ’n motor bekend wil stel, maak Beijing en Sjanghai al meer sin.
Terloops, selfs Toyota het vanjaar sy belangrikste voertuig vir 2009, die nuwegeslag-Prius, op Detroit se motorskou sy wêrelddebuut laat maak.
Tog keer die Japanse vervaardigers Tokio nie die rug nie.
’n Paar interessante nuwe elektriese modelle en konsepmotors gaan wel hul opwagting maak, en wie weet, dalk sal een of twee tog die produksielyn haal.
Intussen brand Tokio se vlam weliswaar kleiner, maar nog steeds sterk.