Motorwagte verkoop Audi vir R1,5 m.
2010-07-24 07:05
Kaapstad - Agt Kaapse motorwagte het hul spogwa vir R1,5 miljoen van die hand gesit.
Hul geld om die Audi R8 van meer as R2 miljoen te onderhou, het opgeraak, maar hulle sal steeds liefdadigheidswerk doen, het hulle gesê.
’n Skatryk sakeman, Rob Taylor, het die sleutel van die motor in Januarie aan die motorwagte oorhandig.
Sy welwillendheidsboodskap – dat motorwagte ook spogmotors kan besit – het hulle geïnspireer om liefdadigheidswerk te doen.
Hulle het tevergeefs probeer om die motor by ’n tweedehandse handelaar te verkoop en dit toe maar vandeesweek aan die handelaar terugbesorg.
Die wagte het die geld, waarmee hulle beplan om ’n organisasie sonder winsbejag op die been te bring, gister in ’n rekening belê, het Didi Kolane van die agentskap Network BBDO, wat hul liefdadigheidswerk behartig, gesê.
Gister is herstelwerk aan die motor, wat vir R2,03 miljoen gekoop is, begin nadat die motorwagte ’n gleuf in die enjinkap gesny het sodat die publiek skenkings ten bate van hul liefdadigheidsveldtogte daarin kon plaas.
Martin Nahimana, een van motorwagte, het vroeër gesê hulle het net sowat R400 per maand in kontant ontvang.
Die wagte het met R36 000 wat hulle ingesamel het ’n klaskamer vir ’n kleuterskool in Philippi gebou.
Michael Britz, verkoopsbestuurder van Audi Kaapstad, het gesê hy het hulle aanvanklik gevra om hulle besluit om die motor te verkoop, te heroorweeg.
Die handelaar moes die enjinkap, skraapmerke, bande en vellings herstel, wat sowat R100 000 gekos het, het Britz gesê.
Van ’n dokumentêre rolprent oor hul lewe met die spoggeskenk wat wêreldwyd vertoon sou word, gaan nou waarskynlik ook niks kom nie.
Volg Nuus24 op Twitter
- Die Burger