Meester Loeb wen weer in Mexiko
2010-03-12 10:41
Johannesburg - Dalk was dit die Citroën C4, dalk was dit die bekendheid met die grondpaaie, maar Sondag het Sébastien Loeb sy houvas op die Mexikaanse tydren verstewig toe hy die vierde keer op ’n streep op die boonste podiumtrap gaan aantree het.
Die Fransman het in verlede maand se openingsronde van die WRC-reeks, die Sweedse tydren, tweede klaargemaak kort op die hakke van Mikko Hirvonen (Ford Focus).
Met Sondag se sege in Mexiko – en Hirvonen se vierde plek – het hy egter die voortou op die punteleer ingeneem met ses punte bo sy aartsvyand Hirvonen.
Loeb, en trouens ’n rits ander Citroën C4’s, het van die wegspring af die ren heeltemal oorheers. Die Franse motors was duidelik vinniger as die Fords en het uiteindelik met ’n puik 1-2-3 op die podium gespog.
Loeb se spanmaat Petter Solberg was tweede, skaars 24 sekondes agter die verdedigende kampioen.
Die Citroën- junior jaer Sébastian Ogier was derde, net 2,7sek. agter Solberg, nadat dié twee deur die hele byeenkoms ’n titaniese stryd om die tweede plek teen mekaar gevoer het.
Hirvonen was vierde, gevolg deur sy spanmaat Henning Solberg (broer van Petter) in die vyfde plek. Dié vierde en vyfde plek was gelukkig steeds goed genoeg om aan Ford die voortou te besorg op die vervaardigers se punteleer. Dit was ’n effense troosprys ná wat vir Ford ’n nagmerrie-naweek in Mexiko was.
Die meester van ’n Loeb het reeds ná die eerste dag ’n gaping van amper ’n minuut oor sy naaste teenstanders opgebou.
Toe Sondag aanbreek, kon hy net “rustig” ry en sy motor vertroetel op die ruwe grondpaaie, terwyl hy só seker gemaak het hy waag nie enige kanse om sy voorsprong prys te gee nie. Vandaar dat sy wen-gaping met die helfte gekrimp het.
Loeb was ná die tyd uitgelate oor dié triomfantelike naweek agter die stuur. “Goed, dis nog net die begin van die seisoen, maar ek’s rêrig gelukkig,” het hy gesê. “Die motor het goed gevoel en ja, dinge in die algemeen lyk heel skaflik.
“Dit was goed om te wen. Ek is terug aan die bopunt van die punteleer en daardie punte wat ons in Swede verloor het, het ons nou teruggekry.”
Ogier was op sy beurt meer filosofies oor sy naelskraapse derde plek net agter Petter Solberg.
Die Fransman het in Saterdag se skofte nie so aggressief gejaag soos hy kon nie, en boonop aan die einde van ’n skof doelbewus getalm voordat hy oor die wenstreep is om genoeg tyd te verspil dat hy ’n swakker tyd as Solberg kon aanteken.
Dié strategie was om hom agter Solberg in Sondag se skofte te laat wegspring.
Die Noorweër sou dan die roete “skoonvee”, wat ’n moeiliker taak sou wees en derhalwe sy tyd sou benadeel.
Sodoende sou Ogier dus makliker kon inhaal op Solberg en die tweede plek verower.
Ongelukkig het dié plan toe skeefgeloop. Solberg het soos ’n besetene gejaag, en veral in die laaste slalom-soort skof die jong Fransman ore aangesit.
“Ja, goed, ons het ’n kans of twee gewaag,” het hy ná die tyd gesê, “en miskien kon ek vinniger as Petter gery het.
"Maar wat, hier is ek nou derde in die ren en dis steeds ’n deksels goeie uitslag.”
Die volgende byeenkoms is die Jordaanse tydren op 1 April.
Punte ná die tweede ronde van die WRC-reeks:
1. Sébastien Loeb (Citroën) – 43
2. Mikko Hirvonen (Ford) – 37
3. Jari-Matti Latvala (Ford) – 25
4. Sébastian Ogier (Citroën) – 25
5. Petter Solberg (Citroën) – 20.
– Beeld