Maak seker jy hoor jou kar biep
2012-01-27 07:01
Johannesburg – Suid-Afrikaners ly maandeliks verliese van meer as R2 miljoen omdat versekeringsmaatskappye nie eise uitbetaal nadat goedere met behulp van seinsteurtoestelle uit motors gesteel is nie, het die versekeraar Aon South Africa gesê.
Kate Lellyett, hoof van persoonlikeprodukoplossings by die maatskappy, het gesê gevalle van seinsteuring (jamming) het die afgelope 18 maande drasties toegeneem.
Volgens die polisie word 40 gevalle van diefstal uit motors elke week in Sandton aangemeld.
Seinsteurtoestelle is in minstens 85% van die gevalle gebruik.
Misdadigers gebruik sulke toestelle om ’n motor-afstandbeheerder se sein te blokkeer wanneer ’n motoris die motor elektronies probeer sluit.
Die toestel keer dan dat die motor sluit.
Die misdadiger kan daarna by die motor inkom om goedere daaruit te steel.
Volgens Lellyett kan ’n toename in die getal eise weens seinsteuring oor die laaste paar maande ook gesien word.
“Seinsteuring het opmerklike implikasies vanuit ’n versekeringsperspektief. As daar nie tekens van gedwonge of gewelddadige toegang tot ’n motor is nie, sal die meeste versekeringspolisse nie vir eise van diefstal uit jou voertuig betaal nie.”
Veral skole en winkelsentrums in die noordelike voorstede in Johannesburg is gewilde teikens vir seinsteuring.
Kapt. Kym Cloete, polisiewoordvoerder, het gesê daar is ’n tendens van seinsteuring by veral laerskole in Sandton.
Ouers los hul handsakke en skootrekenaars in hul motors en misdadigers gebruik die toestelle om sulke goed te steel.
“Ouers moet altyd fisiek seker maak hul motordeure is gesluit.”
Lellyett het gesê motoriste kan hulself beskerm deur seker te maak hulle hoor die biep van hul alarmstelsel en die klank van die sluitmeganisme.
– Volg Nuus24 op Twitter
- Beeld