Loeb wen gemaklik; het een hand op titel
2010-09-02 11:44
Beeld
Dit was die soort sege wat die syfermense weer na die rekordboeke laat soek het.
Die Fransman Sebastien Loeb het die naweek die Duitse tydren met bykans ’n minuut in sy Citroën C4 gewen om sy greep op die titel in vanjaar se Wêreld-tydrenkampioenskap (WRC) nog verder te verstewig.
Om die waarheid te sê, sommer ook vas te messel.
Met vyf seges in vanjaar se nege byeenkomste tot dusver reeds agter sy naam, wil dit lyk of Loeb wêreldtitel no. 7 beslis syne gaan maak.
Daar is nog net vier renne in die reeks oor en wanneer jy begin om met ’n gaping van 51,3 sekondes te wen (en dit boonop oor ’n spanmaat) begin die gevaarligte erg flikker.
Laas in die Michael Schumacher-era in Formule Een het motorsport so ’n groot gees in sy midde gehad wat alles om hom oorheers.
Maar terug na die naweek se teerpad-tydren in Triër, Duitsland.
Dit is die agtste keer wat Loeb daar ’n sege kon behaal wat op sigself ’n rekord in die WRC is.
Die Fransman het die ren van die begin oorheers en Sondag selfs in twee skofte die vinnigste tyd opgestel.
Agter hom het nog twee Ci-troëns sake om die tweede plek uitgespook.
Dani Sordo was uiteindelik tweede, terwyl Sebastien Ogier hard moes werk om die Ford Focus-jaer Jari-Matti Latvala agter hom in die vierde plek te hou.
Die Duitse ren het oor 407 km en 19 skofte gestrek, wat van hom die langste ren in die reeks maak. Die roete was deurgaans teerpad.
Ná die ren het die 36-jarige Fransman gesê dat hy dit geniet om daar te gaan deelneem.
“Ek het nog altyd goed gevaar hier; ek hou nie daarvan om hier te kom staan en verloor nie,” het hy opgemerk.
Loeb se 59ste sege in sy WRC-loopbaan beteken dat hy nou los voor op die punteleer is met 191 punte.
Dit is 58 punte voor Ogier (133), sy naaste teenstander.
Latvala is steeds in die derde plek met 117 punte, maar die Fin was uitgelate oor sy vierde plek.
“Dit is my beste vertoning hier tot nog toe” het hy gesê.
“Die motor is nie die vinnigste op die roete nie, so ek het heel tevrede gevoel om naby die Citroëns te kon bly, al kon ek hulle nie heeltemal inhaal nie.”
Die voormalige F1-kampioen Kimi Räikkönen het in die sewende plek klaargemaak.
Die volgende ren is die Japanse tydren op 10 September.
Volg Nuus24 op Twitter.
- Beeld