Lisensies, rybewyse in Gauteng word duurder
2011-06-01 09:27
Johannesburg - Gautengse voertuigeienaars gaan, benewens die nuwe tolheffings wat op hulle wag, ook meer vir hul voertuiglisensies betaal.
Die lisensiegeld is van 5 Mei met tot 40% verhoog.
Mev. Octavia Mamabolo, woordvoerder van Gauteng se departement van paaie en vervoer, het by navraag gesê provinsies bepaal hul eie lisensiegeld, wat jaarliks hersien word. Sy het gesê Gauteng s’n was altyd laer as van die ander provinsies s’n.
“’n Groot aantal swaar voertuie is goedkoper in Gauteng geregistreer, maar word meestal buite die provinsie gebruik,” het Mamabolo gesê.
Die nuwe bedrae is op 2 Maart vir kommentaar gepubliseer, het sy gesê. “Motoriste en ander rolspelers het 21 dae tyd gehad om kommentaar te lewer.”
Mense wat hul lisensies in April, Mei en Junie moet hernu, betaal nou vir ’n jaar en 3 maande omdat die departement die verhoging van die lisensiegeld in die 2010-’11-boekjaar eers op 1 Julie gedoen het pleks van 1 April soos altyd.
Lisensiegeld word onder meer op grond van die voertuig se gewig bepaal. Eienaars van swaar voertuie word daarom die hardste deur die verhoging getref. Lisensiegeld vir voertuie wat tussen 11 500 kg en 12 000 kg weeg, is nou R16 551 – sowat R5 000 meer.
’n Volkswagen Golf se lisensie sal nou R432 kos en dié vir ’n Jeep Grand Cherokee R648.
* Aansoeke om leerlingrybewyse en rybewyse en die uitreiking van albei gaan ook in die toekoms meer kos.
- Beeld