Kamera sal gemiddelde spoed bepaal
2011-11-02 07:05
Bloemfontein – In die soeke na ’n oplossing vir die talle ongelukke by die sogenaamde kruising van die dood in Langenhovenpark, Bloemfontein, het die owerheid nou ’n spoed-en-navorsingskamera hier opgerig.
Inwoners sê danksy dié kamera op die hoek van Nelson Mandelarylaan en Du Plessislaan ry baie motoriste al stadiger.
’n Verkeerslig wat vroeg verlede jaar ná inwoners se gesoebat van meer as ’n dekade by dié kruising opgerig is, het nie ’n einde aan ernstige ongelukke hier gemaak nie.
’n Lamppaal is weer onlangs deur ’n vragmotor omgery by die plek waar Francine van der Merwe (50) onlangs gesterf het.
Lukas Bezuidenhout, hoof van die ER24-nooddiens, sê dié gevaarlike kruising hou hulle steeds besig.
Die afgelope naweek was sy personeel weer hier op ’n ongelukstoneel.
Hy is ook ’n inwoner hier.
Bezuidenhout meen die kamera wat hier opgerig is, het reeds ’n merkbare verskil gemaak en baie mense ry nou, soos wat vereis word, 70 km/h.
Hy sê die gevaar is egter van so ’n aard dat spoedriffels en flitsende ligte hier aangebring moet word.
Sydney Mogaecho, adjunk-direkteur van verkeersbestuur in die Vrystaat, sê die huidige geel spoedkamera gaan vir ’n tyd lank hier wees om die gemiddelde spoed van voertuie hier te meet en voertuie te tel.
“Navorsing word gedoen om te probeer bepaal of spoed die oorsaak van die probleem is.”
Hy sê die Mangaung-metro-munisipaliteit wou nie verantwoordelikheid vir dié kruising aanvaar nie en die departement van polisie, paaie en vervoer het daarom ingegryp en gehelp dat verkeersligte hier aangebring word.
Hy sê ’n navorser is deur die departement aangestel om uitsluitsel te gee of spoed die probleem is en of kameras ’n wesenlike verskil gaan maak om mense se lewens hier te red.
– Volg Nuus24 op Twitter
- Volksblad