Is ouer bestuurders veiliger as jonges?

2012-09-18 19:51

Stories oor ouer bestuurders wat mense laat dink dat motoriste bo die ouderdom van 70 slegte bestuurders is, is nie die waarheid nie, toon 'n nuwe studie.

Navorsing deur Brittanje se Institute of Advanced Motorists (IAM) het getoon bestuurders bo 70 is nie meer geneig om ongelukke te veroorsaak as bestuurders in enige ander ouderdomsgroep nie.

Bestuurders bo 70 is glo eintlik veiliger as jonger bestuurders.

Daar word van motoriste in die Verenigde Koninkryk verwag om hul rybewyse te hernu wanneer hulle 70 jaar oud word. Daarna moet dit elke drie jaar hernu word.

Altesaam 8% van bestuurders in Brittanje is bo die ouderdom van 70 en hulle is vir slegs 4% van alle ongelukke verantwoordelik, het  IAM gesê.

Maar dié syfer kan waarskynlik toeneem, het IAM bygevoeg. Die aantal bestuurders oor die ouderdom van 90 gaan binne die volgende vyf jaar met 18% (12 400) toeneem. Daar word beraam dat daar teen 2017 altesaam 82 400 90-jarige bestuurders sal wees.

Daar is tans 70 000 bestuurders oor die ouderdom van 90 op Britse paaie.

– Wheels24.

– Volg Nuus24 op Twitter.