Inwoner maak slaggate sélf reg
2010-03-12 12:41
Vanderbijlpark - Ten spyte daarvan dat die owerhede dreig om hom in hegtenis te neem, het Pierre Bouwer (54) begin om die slaggate in die pad wat na sy kleinhoewe lei, sélf reg te maak.
Dié lid van die National Taxpayers Union (NTU) het die slaggate op Stokkiesdraai Pad net buite die dorp saam met ‘n span werkers aangepak.
“Ek en my familie ry omtrent sewe keer ‘n dag heen en weer op dié pad en die slaggate is lewensgevaarlik,” sê hy.
Mari Myburgh, voorsitter van die plaaslike NTU, het gesê owerhede het gedreig om hulle in hegtenis te neem as hulle die slaggate self regmaak.
Volgens die owerhede het hulle nie die nodige kennis om dié werk te doen nie.
Maar volgens Myburgh het Bouwer sy huiswerk gedoen.
“Ek kan lesse gee op Sondae middae,” het die besigheidsman geskerts.
– Wheels24