Honda herroep meer as 300 000 motors
2011-12-02 13:36
Amerika – Die motorvervaardiger Honda het bekendgemaak dat hulle meer as 300 000 voertuie wêreldwyd gaan herroep.
Die gewilde Accord en Civic is onder die modelle wat herroep word weens ‘n fout by die bestuurder se lugsak, het die maatskappy Vrydag gesê.
Volgens die maatskappy is die ergste wat kan gebeur dat die gashouer wat die lugsak opblaas tydens ‘n ongeluk kan breek en stukkies van die veiligheidstoestel sodoende versprei.
Altesaam 304 035 eenhede van die 10 modelle wat tussen 2001 en 2002 vervaardig is word herroep.
Meeste van die motors wat deur die herroeping geraak word is in Amerika en Kanda verkoop, terwyl die ander in Japan en ander streke verkoop is, het Honda gesê.
Honda Suid-Afrika het bevestig dat geen Suid-Afrikaanse mark van die Accord en Civic modelle geraak is nie.
Die maatskappy het gesê hulle gaan die fout met die lugsak regstel deur dit met ‘n nuwe een te vervang.
– Volg Nuus24 op Twitter.
- AFP