Honda herroep 500 000 voertuie

2012-10-09 17:03

Londen – Honda sal nagenoeg 500 000 voertuie herroep nadat 'n fout gevind is wat daartoe kan lei dat 'n brand in die bestuurderskant van sy CR-V-modelle se deure kan ontstaan.

Die Japannese motorvervaardiger het gesê hy het die voertuie herroep ná die ontdekking dat water by 'n elektroniese paneel van dié voertuie se deure kan inlek, wat 'n brand kan veroorsaak.

Volgens Honda word ongeveer 489 000 CR-V-sportnutsvoertuie in Europa en Amerika deur die herroeping geraak.

Sowat 220 000 CR-V's in Europa en ongeveer 268 000 in Amerika sal nagegaan word.

Minstens 100 van dié modelle word ook in Afrika herroep.

Eienaars van CR-V-sportnutsvoertuie word intussen aangeraai om hul motors buite te parkeer, weg van strukture, omdat 'n brand kan ontstaan selfs wanneer die enjin nie aangeskakel is nie.

Die maatskappy sal in November begin om eienaars van CR-V's te kontak sodat dit gratis nagegaan kan word.

– Sky News.

– Volg Nuus24 op Twitter.