Herwin-program maak motorbande duurder
2012-01-12 06:51
Kaapstad – Jy kan dalk reeds van volgende maand af meer vir nuwe bande vir jou voertuig betaal.
Dit is as die nuwe heffing wat as deel van ’n motorbandherwinningsprogram ingestel is aan verbruikers deurgegee word.
Boonop kan dit jou sak verder ruk as duurder bande vir vragmotors tot hoër vervoerkoste en uiteindelik duurder goedere lei.
Edna Molewa, minister van omgewingsake, het die plan van Recycling and Economic Development Initiative (Redisa) vir die bestuur van afvalbande in November ingevolge die Afvalbande-regulasie van 2009 van die Omgewingsbewaringswet goedgekeur.
Die oogmerk van die plan is om afvalbande uit die omgewing te verwyder deur sowat 150 depots oor die land heen te vestig en mense te betaal om die bande daarheen te neem.
Om die plan te finansier gaan ’n heffing van R2,30/kg van 1 Februarie op alle motorbande in Suid-Afrika gehef word.
Teen R2,30/kg sal die heffing op vier bande vir ’n middelslag-gesinsmotor sowat R80 beloop.
Die heffing op vier bande vir ’n groot bakkie sal sowat R320 beloop.
Dieter Horni, besturende direkteur van Continental Tyre SA, het gesê die heffing sal eindelik aan verbruikers deurgegee word, want die plaaslike bandevervaardigingsbedryf sal dit baie swaar vind om die bykomende kostelas te dra.
“Continental Tyre voorsien dat die groter uitwerking op die vragmotorbedryf gaan wees, waar die koste tot dié van die vervoer van goedere en dienste gaan bydra.
Dit kan ’n dubbele heffing beteken vir die gewone Suid-Afrikaanse verbruiker, wat bande vir sy persoonlike voertuig moet koop en dalk die hoër koste van goedere en dienste moet dra,” het hy gesê.
Hermann Erdmann, uitvoerende hoof van Redisa, het gesê die verbruiker dra tans die “koste” van afvalbande in die skade wat dit aan die omgewing aanrig.
Redisa moet teen einde November reeds begin bande insamel, het hy gesê.
Die bande sal verskaf word aan ondernemings wat dit herwin vir rubbersplinters, olie en staal.
Alle vervaardigers, invoerders en handelaars van motorbande moet voor einde vandeesmaand by Redisa registreer, het Erdmann gesê.
Horni het gesê daar is nog nie met hulle oor die plan gepraat nie.
“Continental Tyre sal voortgaan om die SATRP-plan te steun wat die afgelope sowat tien jaar deur die bedryf ontwikkel is.”
Dié motorband-herwinningsplan is in September verlede jaar deur die departement van omgewingsake afgekeur. Volgens Horni sal dit weer voorgelê word.
– Volg Nuus24 op Twitter
- Die Burger