Gordel kinders hierdie somer vas!
2011-12-23 07:35
Kaapstad – Kaapse ouers bestuur nog te veel met kinders op hul skote of op die voorste sitplek sonder gordels, sê Kenny Africa, Wes-Kaapse verkeershoof.
“Dit gebeur ook gereeld dat ouers nie sitplekgordels om hul kinders vasgespe nie. Die wet verplig die bestuurder om te sorg dat ’n kind onder die ouderdom van 14 ’n gordel gebruik. Die bestuurder kan aangekla word vir elke kind wat dit nie doen nie,” het hy gesê.
Volgens Africa is omtrent 60% van sterftes tydens motorongelukke die gevolg van mense wat nie sitplekgordels gebruik het nie.
“Ons versoek ouers om liefs nie babastoeltjies op die voorste sitplek te sit nie. Dis veiliger om die stoeltjies in die middel van die agterste sitplek te laat staan.”
Kinders tot op die ouderdom van drie jaar moet in stoeltjies wat agtertoe kyk, gesit word. Dit is ook onwettig om so ’n stoeltjie op die voorste sitplek te sit.
– Volg Nuus24 op Twitter
- Die Burger