Geen boete as ongeluk laat aangemeld word
2011-10-24 10:37
Kaapstad – Bestuurders wat ongelukke laat aanmeld mag nie gedwing word om ‘n boete te betaal voordat ‘n ongeluksverslag oopgemaak word nie.
Die Johannesburgse metropolisie het dié aankondiging gemaak nadat dit aan die lig gekom het dat motoriste wat ongelukke laat aangemeld het aangesê is om ‘n boete van R1 000 in kontant te betaal alvorens hulle ‘n ongeluksverslag mag open.
Die Johannesburgse metropolisie (JMPD) ontken egter hulle het dié instruksies aan die Johannesburgse polisie deurgegee.
Die probleem het ontstaan ná ‘n misverstand tussen die polisie en die metropolisie oor die boetes.
Volgens die padverkeerswet moet ongelukke binne 24 uur by die polisie aangemeld word.
Die polisie ondersoek slegs ongelukke waarin mense dood is of beserings opgedoen het. Ander ongelukke se inligting word ingesamel en aan die JMPD oorhandig.
‘n Senior polisiebeampte het aan The Star gesê beamptes by sy polisiestasie is deur die JMPD beveel om motoriste boetes te laat betaal voordat hulle ‘n ongeluksverslag kan open.
– Kliek hier om die volledige storie te lees.
– Volg Nuus24 op Twitter.