'Gat in pad is groot gevaar'
2012-02-21 08:03
Johannesburg – Inwoners van ’n straat in North Riding, Johannesburg, meen dis net ’n kwessie van tyd voordat iemand in die reuse-gat daar val.
Die gat voor die North Rand Metodistekerk in die besige Blandfordweg is sowat 11 m by 2 m groot en sowat 4 m diep.
Johannesburg Water (JW) het dit glo in Augustus 2010 gegrawe om ’n gebarste waterpyp reg te maak, maar nie weer toegegooi nie.
Reën en stormwater het die gat groter laat word en die grond onder die teerpad toenemend uitgehol. Aan die ander kant van die pad kraak die mure van ’n huis langs die kerk omdat die grond aan daardie kant ook uitgehol word.
Inwoners meen dit hou groot gevaar in vir hulle, gemeentelede en die kleuters wat ’n crèche sowat 100m daarvandaan bywoon.
“Dit is nie meer ’n kwessie óf iemand gaan seerkry nie, maar wanneer,” het Susan Mottram, DA-raadslid van die Northways-wyk, gesê.
Sy het talle klagtes ontvang van mense in die gebied en vergeefs talle e-posse aan die Johannesburgse munisipaliteit gestuur om die probleem op te los, het sy gesê.
Dis nie net gevaarlik vir voetgangers nie, maar ook vir motoriste, meen Mottram.
Eerw. John Bailie, predikant by die kerk, het gesê hy is verbaas dat niemand nog seergekry het nie.
Baldwin Matsimela, woordvoerder van JW, het gesê hul werk is verby wanneer die pype reggemaak is. Al het JW die gat gegrawe om die pype reg te maak, is dit die Johannesburgse Padagentskap (JRA) se werk om dit toe te gooi.
Adv. Thulani Makhubela, JRA-woordvoerder, het gesê hulle weet van die gat en die gevare. “Ons wil die gemeenskap verseker ons doen alles in ons vermoë om die proses aan te jaag.”
– Volg Nuus24 op Twitter
- Beeld