Ford Escape wéér herroep
2012-07-20 13:16
Detroit – Ford het Vrydag die tweede maal in een week sy nuwe Ford Escape-sportnutsvoertuie herroep ná drie voorvalle aangemeld is waar brande in dié motors se enjinkompartemente uitgebreek het.
Twee van die brande het volgens berigte in Ford se fabriek al uitgebreek, en die ander terwyl ’n motorbestuurder besig was om met een van die voertuie te ry.
Ford het vroeër die week dieselfde voertuie herroep weens ’n probleem met die vloermatte onder die voetpedale, wat moontlik ’n obstruksie kon wees vir bestuurders wat probeer rem.
Die jongste probleem hou verband met brandstofpype in die enjinkompartement wat tot brandstoflekkasies lei en sodoende enjinbrande kan veroorsaak.
Ford het eienaars gewaarsku om nie met die voertuie te ry voordat die krake in die brandstofpype herstel is nie.
Die herroeping raak 11 500 Escape-sportnutsvoertuie in die VSA en Kanada. Slegs 4 800 is aan die publiek verkoop en die res word nog in toonlokale uitgestal.
“Die voertuie sal eers herstel moet word voordat dit verkoop word,” het ’n Ford-woordvoerder, Marcey Zwiebel, gesê.
"Ons tree natuurlik baie vinnig op in die belang van ons kliënte se veiligheid," het sy gesê.
Sy het bygevoeg dat Escape-voertuie wat met ander enjins aangedryf word, nie deur die herroeping geraak sal word nie.
– Volg Nuus24 op Twitter.
- SAPA
