Finaliste vir beste motor is...
2011-10-07 07:06
Johannesburg – Tien klim in die kryt en hopelik sal net een, en nie weer twee nie, dié keer staande bly.
Ja, die Gilde van Suid-Afrikaanse Motorjoernaliste het sy finaliste vir die Motor van die Jaar-wedstryd vir 2012 Donderdagaand op die Johannesburg-motorskou aangekondig.
Die jurielede wat die beoordeling van die finaliste doen om sodoende ’n wenner aan te wys, sal vroeg in 2012 die klompie deur hul passies sit en finaal vir hul gunstelinge stem, waarna die wenner aangekondig sal word.
Die tien wat vanjaar sake om die titel gaan uitspook, is die Hyundai Elantra 1.8 GLS, Kia Picanto 1.2 EX, Alfa Romeo Giulietta 1.4 MultiAir Distinctive, Peugeot 5008 2.0 HDI Active, Ford Focus 2.0 TDCi Trend Powershift, Audi A6 3.0 TDI Quattro, Suzuki Kizashi 2.4 SDLX, Citroën DS4 THP 200 Sport, Mercedes-Benz SLK 350 BlueEfficiency en Volkswagen Jetta 1.4 TSI High-line.
Verlede jaar was daar tot baie mense se verbasing twee wenners – die BMW 530d en dieVW Polo 1.6 TDI – nadat ’n nuwe en baie meer deursigtige beoordeelproses in werking gestel is. Daar word vanjaar op die stelsel voortgebou, met die nodige kriteria om toe te sien dat daar dié keer net een wenner is.
– Volg Nuus24 op Twitter
- Beeld
