Ferrari onthul blits vir 2010-seisoen
2010-01-28 14:12
Maranello, Italië - Ferrari het sy nuwe motor, die F10, tydens ‘n seremonie by sy hoofkwartiere in Maranello, Italië tydens 'n perskonferensie bekend gestel.
“Ons kom uit ‘n seisoen waar ons glad nie kompeterend was nie en ons wil terugkeer na die dae toe ons kampioenskappe gewen het," het Ferrari se spandirekteur, Stefano Domenicali, tydens die bekendstelling gesê.
Een van die meer ooglopende veranderinge aan die F10 is sy wit vlerke wat Ferrari se nuwe borg, die Spaanse bank Santander, voorstel.
In die 2009-seisoen het Ferrari in 'n teleurstellende vierde plek geëindig maar met Felipe Massa wat sy terugkeer maak en Fernando Alonso wat Kimi Raikonnen vervang hou 2010 groot beloftes in.
Hoewel Alonso beslis ‘n gunsteling agter die Ferrari stuur sal wees, was dit Massa wat by die perskonferensie gevra was om die F10 vir ‘n draai om Ferrari se private renbaan te vat.
Die Formule Een seisoen skop op 14 Maart af wanneer die spanne mekaar in Bahrain pak.