F800 baan dalk weg vir CLS
2010-03-12 12:33
Johannesburg - Ook Mercedes het die grofgeskut nader gerol vir sy uitstalling op die Geneefse motorskou, wat pas afgeskop het.
In egte Merc-tradisie sal hy sy groot konsepmodel weer met ’n F-benaming begin, dié keer heet dit die F800 Style.
Die F800 is omtrent so groot soos ’n nuwe E-klas en spog met ’n baie lang asafstand en kort oorhange voor en agter. Die profiel herinner ook sterk aan die huidige CLS-sedan met sy geronde dak- en bagasiebaklyne.
Trouens, dis geen wonder dat die F800 so erg op die CLS trek nie. Die konsepmodel bied bes moontlik ’n voorsmaak van hoe die nuwegeslag-CLS daar sal uitsien. Die nuwe CLS word juis in September op die Paryse motorskou verwag.
Die groot F800 bied egter meer as net ’n voorsmaak van hoe Merc se volgende sedan-koepee-vuurwa gaan lyk. Te oordeel na sy interessante en opwindende lyne, het Merc hier ’n nuwe ontwerptaal beet.
Vanuit die foto’s geoordeel, het Merc se tekenmense ’n bietjie by Chris Bangle se vlam-ontwerp gaan leen. Die deure spog met kepe, inhamme en verwikkelde oppervlakke – aspekte wat sterk kenmerke van Bangle se avant garde-stilering was.
In die binneruim het Merc glo heelwat klem gelê op lig wat inskyn (dink baie glas-oppervlakke, wat deksels warm in SA kan word) en houtinsetsels om hom luuks te laat voorkom.
Daar is ook ’n nuwegeslag-raakskerm in die instrumentpaneel, terwyl die GPS-stelsel nou ook vir jou die reikafstand op ’n kaart kan aandui. Dit is iets wat veral handig vir ’n elektriese motor (met sy kort reikafstand) kan wees.
Volgens vroeë inligting sal die F800 met ’n verskeidenheid aandrywingstelsels toegerus word.
’n Fris V6-petrolenjin van 3,5liter wat 224kW lewer behoort standaard te wees, maar Merc sal hom ook met groen enjinstelsels wil kombineer. Dit sluit in ’n elektriese motor (81kW) wat met ’n litiumioonbattery werk en ’n brandstofsel wat met waterstof werk.
Met net sy batterykrag sal die F800 so 30km kan ry en 120km/h haal. Gekombineer met die petrolenjin raak dinge darem beter – 250km/h is die topsnelheid, sê Merc.
Nog ’n opwindende vuurwa wat sy gesig in Genève wys, is die Joule, Suid-Afrika se eie elektriese motor.
Die Joule is die breinkind van die Kaapse ingenieursgroep Optimal Energy met Kobus Meiring (van Rooivalk- en Salt-faam) aan die stuur daarvan.
Meiring is ook die seun van een van die Kaap se vorige administrateurs.
Die Joule is reeds ’n paar jaar in wording, met die eerste produksiegereed-modelle wat in 2013 na kopers kan gaan. Intussen beplan die maatskappy om einde vanjaar ’n vloot toetsmodelle in Port Elizabeth op die pad te kry.
Die idee is om die publiek en daaglikse gebruikers se gevoelens oor die buks na te vors.
Wat aandrywing betref, gebruik die Joule slegs batterye en ’n elektriese motor wat 65kW en 280Nm wringkrag lewer. Die Joule sal tot ’n topsnelheid van 135km/h beperk word en ’n reikafstand van 300km hê.
Die elektriese motor word oornag gelaai wanneer daar oortollige krag in die nasionale kragnetwerk beskikbaar is.
Voorlopig mik die groep na ’n prys van R235 000 vir dié vyfsitplek-stadsbuksie.
– Beeld