Debat oor tolstelsel duur voort
2011-11-29 13:13
Johannesburg – Die Gautengse wetgewer se staande komitee wat tans openbare sittings oor die omstrede Gauteng tolstelsel hou sal na verwagting Dinsdagmiddag terugvoering gee.
Die Demokratiese Alliansie (DA), Congress of South African Trade Unions (Cosatu) en burgerregte-organisasies het hul menings oor die tolstelsel gelug tydens ‘n openbare verhoor wat vroeër in November plaasgevind het.
Die Gauteng tolstelsel wat in Februarie in werking tree, sal motoriste 40 c per kilometer kos wat sekere hoofweë gebruik.
Baie motoriste voel die publiek was nie behoorlik geraadpleeg voordat die multimiljoenrand-projek die groen lig gekry het nie.
Neil Campbell van die DA het gesê hy hoop hul griewe word gehoor.
“Ons hoop dat die ANC sal luister na wat ons hulle gevra het om te doen en wat die mense van Gauteng hulle gevra het om te doen, en dis om die tolstelsel te skrap,” het hy gesê.
– Eyewitness News.
– Volg Nuus24 op Twitter.