Boere help pad regmaak
2012-02-03 08:01
Bothaville – Boere wat snags en naweke self moet ingryp om gestrande motoriste op die voosgeryde R59 te help, het hul plaaswerkers gratis tot die departement van paaie se beskikking gestel om die duisende slaggate te help regmaak.
Die pad tussen Bothaville en Hoopstad moes baie jare gelede reeds herseël gewees het, maar dit is nooit gedoen nie. Van die teeroppervlak van dié besige pad is daar nou nie veel oor nie.
Faan Nel, voorsitter van die distrikslandbou-unie, sê al die boere wat hy om hulp genader het, het positief gereageer.
Hulle het met James Nkabinde, plaaslike superintendent van paaie, gaan praat en hul hulp aangebied. Die stuk pad tussen die Humansvlakte-plaasskool en die plaas Ladies Request word nou behoorlik herstel.
Andries Els, ’n boer met ’n plaashuis teenaan die pad, sê hy moet bykans elke naweek motoriste te hulp snel wat op die pad gestrand is met meer as een buiteband wat weens die slaggate in die slag gebly het.
Boere sê hoewel die pad baie vir die vervoer van mielies gebruik word, is dit nie net seisoenale verkeer wat dit gebruik nie. “Die pad is ’n lewensaar in die gemeenskap en ’n middelpunt van die Vrystaat tussen die Suide en die Noorde.
Die departement het die pad in 2011 begin herstel, maar net so skielik weer die werk gestaak. Omdat die teerblad baie jare laas verseël is, is dit nie meer waterdig nie en bestaan nou hoofsaaklik net uit slaggate.
“Ons het ons werkers en hulp aangebied omdat hierdie pad werklik belangrik vir elke gebruiker daarvan is. Ons het ’n goeie samewerking met die plaaslike departement, maar wil die provinsie vra om die erns van die saak te besef. Hierdie is net ’n tydelike maatreël. Dit is ook uiters noodsaaklik dat weegbrûe weer op die pad in werking gestel word. Oorlaaide vragmotors is een van die redes waarom dit in die toestand is waarin dit is.”
– Volg Nuus24 op Twitter.
- Volksblad