Bejaarde geniet dronk plesierrit in rolstoel
2011-09-06 14:52
Noorweë – ‘n 84-jarige man onder die invloed van alkohol is in Noorweë in hegtenis geneem nadat hy in die verkeerde rigting op ‘n hoofweg in sy elektriese rolstoel gery het, het die polisie gesê.
Die man is Saterdagaand naby sy huis in Porsgrunn aangekeer.
Hy het deur ‘n tonnel van 184 m gery voordat hy omgedraai en deur dieselfde tonnel gery het. Hy is toe deur twee motoriste gestop.
Hulle het die polisie ontbied en die man se rybewys is op die toneel gekonfiskeer. Hy moes ook bloedtoetse laat neem, maar die uitslae is nog nie bekend nie.
Wette vir voertuiglisensies geld nie vir rolstoele nie en die polisie kyk nou na maniere hoe hulle die man se rybewys nietig kan verklaar.
Die man kan ook 'n boete opgelê word omdat voetgangers en rolstoele op hoofweë verbied word.
– Volg Nuus24 op Twitter.
- AFP