BMW’s verdwyn voor motorskou
2010-04-12 12:07
Kaapstad – Die meeste van die wêreld se gewildste motorskoue, soos dié in Frankfurt, Parys en Genève, vind in Europa plaas.
Wanneer New York se motorskou egter aan die begin van April aanbreek, is Europese motorvervaardigers verplig om hul nuutste produkte weswaarts oor die Atlantiese Oseaan te stuur.
Alhoewel dit ‘n logistieke takie is wat afgehandel moet word, verwag geen vervaardiger dat enigiets sal verkeerd loop nadat die voertuie by hulle bestemming aangekom het nie.
Vanjaar se BMW-uitstalling by die New Yorkse motorskou het egter baie duurder uitgewerk as wat aanvanklik verwag is.
Ses van die maatskappy se voertuie is in verskillende voorvalle gesteel terwyl die motors vanaf New Jersey se hawe na New York onderweg was.
Onder die motors wat gesteel is, is die 535i xDrive, 650i, 750Li en ‘n seldsame 550i Sophisto. Dié motor is na bewering sowat $90 000 (R650 000) werd.
Die eerste rooftog het op 13 Maart plaasgevind, sowat drie weke voor die opening van die skou.
BMW het gesê hulle het alle relevante inligting moontlik aan die owerhede gee.
-Wheels24