Auris, Polo’s pak grond, teer
2010-07-23 02:12
Kaapstad – Dis presies halfpad deur die tydren-seisoen en sake op die punteleer is op ’n vonkprop se skerpkant vir die jaers én die spanne gebalanseer.
Die VW-tydren, die vyfde ren van agt byeenkomste in vanjaar se nasionale tydrenreeks, vind dié naweek in Port Elizabeth en omstreke plaas en die jaers kan maar solank gereedmaak vir ’n lekker moeilike byeenkoms.
Hoewel die Oos-Kaapse streek nie die laaste paar maand so baie reën gehad het nie, sal die talle skofte wat deur die Longmore-woud geskied die jaers se vernuf behoorlik beproef.
Die ren is een van die min op die Suid-Afrikaanse kalender wat so ’n verskeidenheid rentoestande.
Dit wissel van glyerige grondpaaie tot goeie-greep-teerpaaie.
Hoewel ’n stewige getal van 40 spanne hulself vir die ren ingeskryf het, is dit die groot tweestryd tussen Toyota se S2000 Auris en die VW Polo’s wat weer eens die meeste van die kalklig sal steel.
VW se Enzo Kuün is tans die voorloper op die punteleer, maar net vier punte agter hom is Johnny Gemmell in sy Auris.
Gemmell het by die vorige byeenkoms, die SA tydren in Mpumalanga, met ’n breuk van ’n sekonde oor Jannie Habig (Polo) geseëvier en so tot by die hakke van Kuün gevorder.
In sy tuisren sal die VW-span dus weer goed nadink oor dié dag se 0,7 sekondes wat hulle van ’n eerste plek geskei het.
Wat die naweek se byeenkoms egter nog interessanter kan maak, is dat die volgende ses mededingers almal binne tien punte van die voorlopers is.
Met nog vier renne op die kalender oor, sal ’n sege die naweek dus net die nodige hupstoot wees om jou neus voor te kry.
’n Gevaarlike buiteperd is die Ford Fiesta, wat vanjaar in sy eerste seisoen deelneem.
Die motor het in sy eerste ren uitgebrand, maar ’n nuwe een is vanuit Europa laat kom en met Conrad Rautenbach agter sy stuur behoort hy die voorste jaers goed op hul pasoppens te hou.
Die ren begin môre met drie skofte wat in die Longmore-woud afgehandel sal word, waarna die jaers Saterdag in Port Elizabeth sal eindig.