Afrika se grootste motorskou eersdaags in Jhb
2011-08-04 11:19
Bloemfontein – Suid-Afrikaners kan hul vere regskud vir die grootste motorskou in Afrika – die Johannesburgse motorskou, wat van 6 tot 16 Oktober gehou word.
Die skou word vanjaar weer by die Nasrec-sentrum in die suide van Johannesburg gehou.
Vanjaar se skou-ervaring behoort egter beter as voorheen te wees, aangesien die sentrum verlede jaar vir die Wêreldbeker-sokkertoernooi opgeknap en mooigemaak is.
Die Johannesburgse skou is ’n “afstammeling” van die oorspronklike Auto Africa-skou van ’n paar jaar gelede. Dié tweejaarlikse skou is later deur nuwe eienaars oorgeneem, waarna die naam na Jims (die Johannesburgse Internasionale Motorskou) verander is.
Aangesien die skou laas in 2008 plaasgevind het, moes hy verlede jaar weer sy skou-tekkies aantrek. Die groot sokker het egter gemaak dat die organiseerders hul datum na vanjaar geskuif het.
Intussen het die eienaars besluit om nog ’n slag die naam te verander. Dit is nou net die Johannesburgse skou, glo om dinge meer standaard met ander wêreldname soos Detroit en Genève te maak.
Maar terug na vanjaar se motorskou.
Daar sal oudergewoonte nie net nuwe rygoed uitgestal word nie, maar ook bybehore, onderdele en die jongste tegnologie wat in die motornywerheid ingespan word.
Verskeie konferensies oor die motorbedryf en sy verwante nywerhede, bygewoon deur van die land se voorste kenners, sal ook in dié tyd by Nasrec plaasvind.
Maar ja, dit is die nuutste en blinkste rygoed wat die besoekers weer ’n slag gaande gaan hê.
Intussen maak plaaslike vervaardigers hulself gereed om die skou te gebruik om ’n klomp nuwe rygoed in Suid-Afrika los te laat.
Terselfdertyd gaan ’n paar eksklusiewe voertuie, direk van die Frankfurtse skou waar hulle hul wêreldpremière beleef het, vir die publiek gewys word.
- Beeld