70% in SA gebruik selfone agter die stuurwiel
2011-10-21 07:08
Johannesburg – Sowat 70% van Suid-Afrikaanse motoriste gebruik selfone terwyl hulle bestuur, al is dit onwettig.
Luidens ’n onlangse verslag deur CIB Insurance Administrators (CIB) is selfoongebruik die grootste probleem wat betref aandag-afleibare gedrag.
Ander aandag-afleibare gedrag agter die stuurwiel sluit in eet en drink, persoonlike versorging en om op ’n satelliet-navigasiestelsel pleks van die pad te fokus.
Andrew Lilley, uitvoerende hoofbestuurder van CIB, het gesê dit is onrusbarend as Suid-Afrika se hoë pad-ongeluksyfer in ag geneem word.
“Motoriste besef nie hoe hul gedrag hul aandag kan aflei en hul tyd om te reageer met die helfte verminder nie.”
Volgens die Automobiel-Assosiasie (AA) is aandag-afleibare gedrag moontlik ses keer gevaarliker as dronkbestuur.
“As in ag geneem word dat ’n motoris met ’n alkoholvlak van 0,05 g per 100 ml bloed ’n 15 keer groter risiko loop om in ’n ongeluk betrokke te wees, is dit in dié konteks skrikwekkend.”
Vanessa Jackson van ER24 het gesê hul paramedici sien op pad na ongelukstonele baie motoriste wat SMS’e stuur terwyl hulle bestuur.
“Dis vanselfsprekend dat mense wat hul selfone gebruik nie behoorlik na die pad kyk nie.”
Sy het gesê kinders is ook ’n groot bron van aandag-afleibare gedrag. Jackson het motoriste gemaan om seker te maak hul kinders dra sitplekgordels en om nie heeltyd te kyk wat die kinders aanvang nie.
“Vroue is geneig om hulle in die verkeer te grimeer. Dit kan ’n ongeluk tot gevolg hê en hulle is ’n makliker teiken vir kapers.
“Harde musiek en die gebruik van oorfone is ook gevaarlik.”
Volgens die Amerikaanse nasionale administrasie vir hoofweg-verkeersveiligheid was 18% van noodlottige ongelukke in 2009 in dié land die gevolg van aandag-afleibare gedrag.
– Volg Nuus24 op Twitter
- Beeld