Wen met Jan Braai en Nuus24
2012-09-14 09:47
In Vuurwerke deel die bekende en ikoniese Jan Braai vir die eerste keer sy omvattende kennis van vuurmaak en vleisbraai met al sy aanhangers en dié wat graag die eeue oue kuns wil bemeester.
Jan is waarskynlik die persoon in Suid-Afrika wat al die meeste vrae oor braai in onderhoude moes beantwoord. Hy is dus goed in voeling met dit waaroor die meeste mense wonder en spreek dit in Vuurwerke aan.
Die boek bevat Jan se duidelike en deeglike instruksies vir die braai van steak, lamstjops, sosaties en beesstert-potjie. As jy dit eers onder die knie het, kan jy die braairibbetjie, lamsboud of spitbraai probeer. En al die ou gunstelinge soos braaibroodjies, stywe pap, mielies en selfs ’n nagereg of twee is ook daar.
Maar wat Vuurwerke werklik uniek maak, is Jan se passie wat spreek uit die details by elke resep. Van die uitsoek van jou vleis in die winkel of slaghuis tot die voorbereiding en die ideale manier van gaarmaak, word deeglik uitgelê. Boonop deel Jan graag sy kennis oor slagters en ander verskaffers.
Met Vuurwerke wou Jan nie net ’n versameling braairesepte met vae instruksies bymekaar bundel nie. “My doel met die skryf van die boek was om waarde toe te voeg tot jou lewe en om dit op so ’n manier te skryf dat dit nut het en bruikbaar is,” sê Jan.
Dit is by die vuur waar die koring van die kaf geskei word en met sy nuwe boek wys Jan Braai jou hoe!
Oor die outeur:
Jan Scannell – beter bekend as Jan Braai – is ’n Suid-Afrikaanse instelling so eie aan ons land soos sy een groot passie, vleisbraai. Sy ander groot passie is nasiebou.
Jan het 24 September eiehandig tot ’n jaarlikse kuier- en kosfees omskep deur Erfenisdag nie-amptelik te herdoop tot Nasionale Braaidag.
Sedert die instelling in 2005 word Nasionale Braaidag bemark met die doelwit om ’n landswye feesdag vir Suid-Afrika te skep. Die een aktiwiteit wat alle Suid-Afrikaners saambind, is immers ons liefde vir kos kook oor oop vure.
Jan was ook die eerste Suid-Afrikaner om 'n Guinness wêreldrekord in braai aan te teken. Sy TV-program Jan Braai vir Erfenis is in 2011 op KykNET uitgesaai en het ’n rekord-kykergetal gehad. Hy is tans besig met die verfilming van die tweede reeks wat vanaf Julie 2012 uitgesaai word. Jan is ook op Woensdagoggende van 06:00 tot 09:00 'n gasomroeper op die ontbytprogram van Good Hope FM.
Wen met Jan Braai en Nuus24! Beantwoord eenvoudig die vraag hieronder en vul jou besonderhede in vir 'n kans om een van twee eksemplare van Vuurwerke te wen.
