Die beste hoender-tikka-masala
2012-09-14 09:17
Hoender-tikka-masala is een van die bekendste tandoori geregte. Tikka beteken ‘stukke’, maar hoender-tikka verwys na ‘n spesifieke gereg met hoenderstukke wat in masalaspeserye en jogurt gemarineer is, op ‘n sosatiepen geryg is en in ‘n tandoor gaargemaak is (of in dié geval, gebraai is). Hoender-tikkamasala is een van my gunsteling kerries – en gaan waarskynlik een van joune ook wees sodra jy dié resep bemeester het.
Wat jy nodig het
(vir 4 mense)
Die hoender:
600 g ontbeende hoendervleis
sonder vel (‘n pakkie van 4 hoenderborsies)
1 koppie gewone jogurt
2 sopies hoender-tikka-masala speserye (of tandoori-masala of enige goeie masala- mengsel wat jy by jou speserysmous kan kry en wat rooi van kleur is)
1 sopie suurlemoensap
omtrent 6 sosatiepenne
Die sous:
1 sopie knoffel
1 sopie gemmer
olie of botter
1 x 400 g-blikkie tamatiepuree (of opgekapte tamaties)
2 tot 3 sopies tamatiepasta
1 koppie room
½ koppie klapperroom
1 teelepel garam masala (Dit smaak anders en is effens sterker as gewone masala omdat dit ander bestanddele in ander verhoudings bevat. Jy moet my vertrou, garam masala is die speserymengsel wat jy vir die dis nodig het, so gaan soek dit by jou speserysmous.)
1 teelepel fyn borrie
1 teelepel fyn paprika
½ teelepel fyn chilli (opsioneel, kan meer of minder wees)
2 sopies gemaalde amandels
sout
heuning
2 sopies opgekapte vars
koljanderblare (dhania)
Laat waai!
1. Sny die hoender in hapbare stukke op en meng in ‘n marineerbak met die jogurt, masala en suurlemoensap.
Bedek en sit in die yskas om vir ‘n paar ure of oornag te marineer.
2. Ryg die hoenderstukke op sosatiepenne en braai oor warm kole totdat hulle gaar is. Moet jou nie bekommer oor die paar swart kolle gekarameliseerde hoender wat jy sien nie.
3. Braai die knoffel en gemmer in ‘n lagie olie of botter in ‘n swartpotjie of ‘n vuurvaste pan. As daar marinade oor
is, voeg dit ook by.
4. Na 2 minute voeg jy al die ander bestanddele by (hou eers die sout, heuning en koljanderblare eenkant). Laat die sous vir 15 minute prut. Wanneer die sous prut, proe daaraan.
As jy wil, maak die volgende aanpassings:
Voeg nog sout by as dit nodig is.
Maak die sous sterker deur nog chillipoeier by te sit en/of soeter deur nog heuning by te voeg.
Om die kleur rooier te kry, voeg ekstra paprikapoeier by; om dit geler te kry, voeg ekstra borrie by.
5. Wanneer die sous na jou smaak is, begin dik word en die hoender gebraai is, verwyder die sosatiepenne en
voeg die sous by die hoenderstukke. Roer die dhania (koljanderblare) by en bedien met basmati-rys.
En...
As jy dink jy kan ‘n klomp balle in die lug hou, kan jy natuurlik tegelykertyd die hoender braai en die sous maak.
– Uit Vuurwerke deur Jan Braai, met vergunning van Human & Rousseau, Bookstorm.
