Tsvangirai weerstaan druk oor 2011 verkiesing
2010-01-22 12:27
Kaapstad - Die Zimbabwiese premier, Morgan Tsvangirai, het Dinsdag volgehoue druk deur pres. Jacob Zuma oor volgende jaar se algemene verkiesing weerstaan.
Zuma is die taak opgelê om as bemiddelaar op te tree in onderhandelinge tussen pres. Robert Mugabe se Zanu-PF en die MDC-party, onder leiding van Tsvangirai.
Zuma probeer om die kwessies van die sogenaamde globale politieke ooreenkoms (GPA) te implementeer, wat die eenheidsregering verlede jaar geskep het.
“Pres. Zuma kan nie druk op ons plaas om 'n verkiesing te hou nie. Die verkiesing sal deur die GPA bepaal word,” het Tsvangirai gesê.
Die GPA stel dat die president en premier ‘n datum vir die verkiesing sal bepaal nadat 'n referendum gehou word.
Volgens Tsvangirai moet daar ná volgehoue gesprekke eers ‘n konstitusie opgestel word, waarna ‘n referendum gehou moet word om dit goed te keur. Dan éérs, meen die premier, sal ‘n datum vir die verkiesing vasgestel kan word.
- Sapa-dpa