Zuma sal vra dat Navo-aanvalle in Libië stop
2011-07-04 13:54
Johannesburg – President Jacob Zuma gaan Afrika se standpunt oor die krisis in Libië aan ander wêreldmagte voorhou, berig RSG.
Zuma is deur die Afrika-unie afgevaardig om 'n Navo-beraad met Rusland in Moskou by te woon.
Rusland het veto-reg in die Verenigde Nasies se Veiligheidsraad, wat Navo-magte die mandaat gee om burgerlikes in Libië te beskerm.
Zuma sal Navo-bevelvoerders probeer oortuig om hul magte uit Libië te onttrek.
Hy het gesê dit is belangrik dat lande soos Rusland weet wat Afrika se standpunt oor die oplossing van die probleme is.
Libiese rebelle het intussen die Afrika-unie se vredesplan verwerp, omdat hulle sê dat dit ruimte laat dat Muammar Gaddafi steeds aan bewind kan bly.
Die leier van die rebelle-beweging het gesê Gaddafi mag in Libië aftree, op voorwaarde dat hy sy mag oorgee en instem tot internasionale toesig.
– Volg Nuus24 op Twitter.
– RSG