Zuma met militêre eer in Zim ontvang
2010-03-17 02:03
Tangai Chipangura
Harare - Pres. Jacob Zuma wil Zimbabwe se leiers verplig om twispunte eers opsy te skuif en só die weg vir nuwe verkiesings in 2011 te verseker.
Zuma het Dinsdagaand in Harare aangekom vir ’n besoek van twee dae, met ’n dooiepunt wat die eenheidsregering ná 13 maande in die gesig staar.
Pres. Robert Mugabe, die premier, Morgan Tsvangirai en adjunkpremier, Arthur Mutambara, het hom op die internasionale lughawe in Harare ontmoet.
Zuma is met volle militêre eerbetoon ontvang. Hy het nie met joernaliste gepraat voor hy na die Rainbow Towers Hotel, waar die rooi tapyt vir hom uitgerol is, is nie.
Mugabe se Zanu-PF en Tsvangirai se MDC stamp koppe oor verskeie kwessies van die magsdelingsooreenkoms wat nog nie in werking gestel is nie.
Hulle kan nie ooreenkom oor talle hoë aanstellings nie, waaronder die provinsiale goewerneurs, Gideon Gono as die president van Zimbabwe se Reserwebank en Roy Bennett, MDC-tesourier, as adjunkminister van landbou.
Intussen is plaasbesettings drasties opgeskerp, oorheers Zanu-PF die proses om ’n nuwe grondwet op te stel en word die party se jeugmilisie toenemend geheraktiveer.
Zuma wil glo hê die partye moet dié kwessies eers los en eerder op die voortbestaan van die eenheidsregering fokus asook verseker die verkiesing vind wel volgende jaar plaas.
Zuma sukkel sedert November 2009 om namens die Suider-Afrikaanse Ontwikkelingsgemeenskap die geskille in die eenheidsregering op te los. Dit is sy tweede besoek aan die land sedert hy verlede April tot president van Suid-Afrika verkies is.
Zuma sal vandag eers afsonderlike vergaderings met Mugabe, Tsvangirai en Mutambara hou en later ’n gesamentlike vergadering.
- Die Burger