Zuma en Dos Santos wil bande verstewig
2010-12-14 20:11
Kaapstad - President Jacob Zuma en sy Angolese eweknie, Eduardo Dos Santos wil ekonomiese bande tussen dié twee lande verstewig.
Die twee staatshoofde het Dinsdag in Pretoria vergader.
Dis Dos Santos se eerste staatsbesoek aan Suid-Afrika sedert die einde van apartheid in 1994.
Angola is een van die grootste olieprodusente in Afrika en 'n strategiese sakevennoot vir Suid-Afrika.
Dos Santos sal na verwagting nouer samewerking tussen Sonango en PetroSA aankondig om 'n olieraffinadery te bou en te bestuur.
In 2009 het handel tussen Suid-Afrika en Angola stadig maar seker toegeneem. Uitvoere na Angola beloop sowat vyf en 'n half miljard rand, terwyl Suid-Afrika goedere, insluitend olie, ter waarde van sowat 12 miljard rand vanaf Angola invoer.
- RSG