Zimbabwiërs ‘sal nie uitgeskop word’
2010-12-21 09:20
Beeld
Johannesburg - Zimbabwiërs wat aansoek gedoen het om wettig in Suid-Afrika te wees, sal nie in hegtenis geneem word of uit die land gesit word as hul aansoeke nié teen einde Desember verwerk is nie.
Dr. Nkosazana Dlamini-Zuma, minister van binnelandse sake, het gister tydens ’n verrassingsbesoek aan die Harrisonstraat-kantoor van dié departement aan honderde Zimbabwiërs gesê hulle moet slegs aansoek doen om “veilig” te wees.
“Ek wil mense verseker dat hulle nie in hegtenis geneem sal word indien hulle nog nie hul dokumente het nie.
“Maar hulle moet aansoek doen en bewys daarvan kan lewer,” het Dlamini-Zuma gesê.
Die minister en haar direkteur-generaal, Mkuseli Apleni, het die kantoor besoek om vas te stel hoe die registrasieproses vorder.
Die regering het vroeër gesê Zimbabwiërs wat teen 31 Desember onwettig in die land is, sal gedeporteer word.
Dlamini-Zuma het gister gesê dat dié wat wel aansoek gedoen het nie bekommerd hoef te wees nie. Hulle sal egter nie na Zimbabwe kan gaan sonder die nodige permitte nie.
“Dit is ’n ongerief, maar daar is te veel aansoeke om dit voor Kersfees te verwerk.”
Ronnie Mamoepa, departementele woordvoerder, het gesê sowat 84000 Zimbabwiërs het in Gauteng aansoek gedoen.
“Maar daar is nog tienduisende wat moet registreer en ons gaan nié die sperdatum uitstel nie,” het Mamoepa gesê.
Volgens Dlamini-Zuma word die registrasieproses deur die Zimbabwiese regering vertraag, want hy sloer met die uitreiking van wettige paspoorte aan sy burgers.
Sy het egter gesê haar departement sal alles in sy vermoë doen om die proses aan te help.
Ngqabutho Dube, ’n woordvoerder van die MDC, het ’n lys name aan Dlamini-Zuma oorhandig van Zimbabwiërs wat nie geboortesertifikate of identiteitsdokumente het nie.
Dlamini-Zuma het gesê haar departement sal by die Zimbabwiese regering aansoek doen om die nodige dokumente te kry.
Mamoepa het gesê 2911 amnestie-aansoeke is ontvang van mense wat identiteitsdokumente onregmatig bekom het.
- Volg Nuus24 op Twitter.
- Die Burger