Zimbabwe mag diamante uitvoer
2010-07-16 10:49
Kaapstad – Zimbabwe het toestemming ontvang om voort te gaan met die uitvoer van ongeslypte diamante uit die Marange-diamantvelde, berig Times Live.
Die Kimberley proses het ooreengekom dat Zimbabwe teen September twee vragte ongeslypte diamante uit die Marange-diamantvelde mag uitvoer.
Die proses sal egter onder streng toesig plaasvind.
Die Kimberley proses sal intussen die situasie in Zimbabwe se diamantbedryf hersien terwyl ‘n monitor van die proses Zimbabwe vir die eerste keer sal besoek.
In September sal die monitor Zimbabwe vir ‘n tweede keer besoek om toesig te hou oor die tweede vrag diamante wat uitgevoer sal word.
Die verkoop van 300 000 karaat diamante uit die oostelike Marange-velde is verlede jaar deur die internasionale reguleerder gestop nadat daar bevind is dat Zimbabwe nie aan die standaarde wat gestel is vir menseregte voldoen het nie.
Volg Nuus24 op Twitter.