Zim wil miljarde by SA leen
2012-09-07 10:43
Harare – Zimbabwe sal by Suid-Afrika en Angola om hulp aanklop om ‘n tekort van $400 miljoen (sowat R3 miljard) in dié land se begroting.
Tendai Biti, Zimbabwe se minister van finansies, het gesê ‘n gebrek aan buitelandse beleggings is die hoofrede waarom Zimbabwe sy buurlande om hulp sal nader.
Zimbabwe se ekonomie is stadig maar seker besig om te herstel ná ‘n koalisieregering in 2009 gevorm is, maar ly steeds erg as gevolg van die dekade lange resessie wat blameer word op onder andere pres. Mugabe se omstrede grondhervormingsbeleid.
Biti het gesê Zimbabwe wil ten minste $150 miljoen (sowat R1,2 miljard) by Suid-Afrika en Angola leen.
“Ek het oor so twee weke ‘n belangrike vergadering met Suid-Afrika se minister van finansies,” het Biti by ‘n mediakonferensie gesê. “Tydens hierdie vergadering gaan ek vra vir geldelike steun van $100 miljoen (sowat R828 miljoen).”
Zimbabwe is ook glo besig om met Angola te onderhandel oor geldsteun van sowat $50 miljoen (sowat R414 miljoen).
Biti het bygevoeg dat hy Suid-Afrika sal vra om ‘n bedrag van sowat R500 miljoen wat in 2009 bewillig is, beskikbaar te stel vir gebruik. ‘n Kredietfasiliteit van R1,75 miljard, wat dekades gelede tussen Suid-Afrika en die destydse Rhodesiese regering geskep is, kan moontlik ook weer oorweeg word.
Die Zimbabwiese regering moet voor die einde van die jaar R3 miljard bekom om jaarlikse bonusse te kan betaal en om die 2012/2013-landbouseisoen te kan finansier.
Zimbabwe skuld ander lande reeds sowat $9,1 miljard (sowat R75 miljard).
Biti het bygevoeg dat Zimbabwe ook met China onderhandel oor ‘n lening van $350 miljoen (sowat R2,9 miljard) om sy Kariba-kragstasie uit te brei.
– Volg Nuus24 op Twitter
- Reuters
