Zim vry hard na uitgewekenes
2010-12-06 12:42
Victoria Falls - Zimbabwe sal later in Desember sy eerste konferensie ooit vir uitgewekenes hou, berig die Zimbabwiese publikasie Herald Online.
Die konferensie sal sakelui, burgerlikes, politici en Zimbabwiese uitgewekenes van oor die hele wêreld heen in die dorpie Victoria Falls byeenbring. Die tema van die konferensie is "Interaksie met die diaspora ter wille van Zimbabwe se ekonomiese rekonstruksie," en sal plaasvind van 16 tot 18 Desember.
Dié konferensie is na verwagting die eerste in 'n reeks byeenkomste wat daarop gemik is om maniere te vind waarop uitgewekenes en sleutelpersone in Zimbabwe kan saamwerk om ontwikkeling te bevorder.
"Ons hoop om die netwerk van Zimbabwiese uitgewekenes te versterk, en om hulle vermoë te verbeter om 'n bydrae te maak tot algehele nasionale herstel en ontwikkeling," het die uitvoerende direkteur van die Ontwikkelingsvereniging vir Zimbabwe, Nokwazi Moyo, gesê.
Ongeveer 4,5 miljoen Zimbabwiese burgers woon buite die land. Die meerderheid van dié groep het hulle gevestig in Suid-Afrika.
- Volg Nuus24 op Twitter
- SAPA