Zim soek vroulike soldate
2011-08-30 10:53
Harare – Vroulike soldate in Zimbabwe word uitgedaag om aan te meld as vrywilligers vir opleiding vir dié land se elite-kommando in ‘n poging om gelyke beroepsgeleenthede vir alle Zimbabwiërs te bied, het die Herald Online Dinsdag berig.
Dié program word tans deur mans gedomineer.
Steven Gwekwerere, 'n hooggeplaaste beampte by die weermag se hoofkantoor, het gesê Zimbabwe se weermag diskrimineer nie op grond van geslag nie.
“Kommando-opleiding is uiteraard moeilik en die wat daaraan wil deelneem moet vrywilliglik so doen. Baie keer laat vroue dit eerder aan die mans oor. Die weermag hoop om meer vroue aan dié program te sien deelneem.”
Hy het gesê dat die opleiding die moeilikste is waardeur ‘n soldaat kan gaan omdat dit die uiteindelike toets van fisieke en geestelike uithouvermoë is wat mans van seuns skei.
"Die doel van die toets is nie net om bevelvoerders op te lei wat in komplekse situasies kan voorbly nie, maar ook sodat hulle maklik kan aanpas in die veranderende internasionale omgewing,” het Gwekwerere gesê.
– Volg Nuus24 op Twitter.
- SAPA