Zim minister raak ongeduldig met EU
2010-06-15 17:40
Harare – Zimbabwe se minister van buitelandse sake het die Europese Unie daarvan beskuldig dat hy ‘n nuwe ronde samesprekings vertraag.
Die samesprekings is daarop gemik om die vordering van politieke en menseregte-hervormings in die land vas te stel.
“Dit wil voorkom of die EU nooit dié gesprek ernstig opgeneem het nie,” het minister Simbarashe Mumbengegwi gesê.
‘n Groep afgevaardigdes van die Zimbabwiese regering was veronderstel om in Mei Brussels toe te gaan om bande tussen die EU en Zimbabwe te verbeter.
Die besoek is egter gekanselleer weens die vulkaniese as wat vlugte oor die hele Europa in dié tyd belemmer het.
“Ons wag steeds vir die Europese Unie om aan te dui wanneer ons kan kom.
“Hulle vat omtrent hulle tyd,” het die minister bygevoeg.
Volg Nuus24 op Twitter.
- AFP