Zim leen nog R3.8 miljard by IMF
2009-09-04 23:39
Harare - Die Internasionale Monetêre Fonds (IMF) het finansiële hulp van R3.8 miljard aan Zimbabwe verleen.
Die lening wys dat die wêreld stadig maar seker die koalisieregering in dié land begin aanvaar, het die president van die Zimbabwiese reserwebank, Gideon Gono, gesê.
Die IMF het Zimbabwe in 2001 geskors. Die liggaam het egter beperkte hulpverlening aan die land se kreupel ekonomie in Mei hervat op gronde van "verbeterde samewerking rondom ekonomiese beleid".
Die land se koalisieregering, gevorm deur president Robert Mugabe en Morgan Tsvangirai se party, die MDC, probeer ’n ekonomiese krisis stop wat al jare lank woed.
Zimbabwe skuld miljoene rande aan die IMF en ander leners.
- AP