Zim kry groen lig vir diamantverkope
2011-01-05 15:58
Harare - Zimbabwe het toestemming ontvang om – met toesig – voort te gaan met die verkope van diamante wat ontgin is by die omstrede Marange-velde in dié land, het 'n senior regeringsamptenaar Woensdag gesê.
Gift Chimanikire, adjunk-minister van myne, het gesê dat Harare 'n brief van die Kimberley-proses-sertifiseringskema ontvang het wat toestemming verleen dat diamante wat tussen 2006 en 2009 ontgin is, verkoop mag word.
Die Kimberley-proses is 'n groepering van lande wat in diamante handel dryf wat, tesame met burgerlike groepe, die handel in sogenaamde konflikdiamante teenstaan. Die groep beheer meer as 90 persent van die wêreld se diamantmark.
"Ons het gewag... vir toestemming om voort te gaan," het Chimanikire aan die Duitse nuusagentskap DPA gesê. "Ons werk aan die nodige prosesse om die verkope so gou as moontlik te doen."
Die Marange-diamantvelde in die ooste van die land is telkens in die nuus oor bewerings van menseregtevergrype en diefstal deur die weermag en regeringsamptenare, veral by die berugte Chiadzwa-veld.
Die meeste Westerse lande wat by die handel in diamante betrokke is wil nie hê dat Zimbabwe toegelaat moet word om diamante te verkoop tot die menseregte-situasie in die land nie verbeter nie.
- Volg Nuus24 op Twitter
- Sapa-DPA