Zim kort sowat 15 000 onderwysers
2011-07-18 09:17
Harare – Sowat 15 000 onderwysposte in Zimbabwiese staatskole bly vakant omdat skoolverlaters ongewillig is om die beroep aan te pak, het die Herald Online berig.
Die vakante poste word meer ondanks die feit dat die regering gewillig is om amnestie aan onderwysers te bied wat tydens die ekonomiese krisis die land verlaat het.
Sibonginkosi Mutasa, ‘n direkteur in die departement van onderwys, sport, kuns en kultuur, het gesê dat van die 111 000 onderwysposte in die land, slegs 96 000 deur gekwalifiseerde onderwysers gevul is.
Die oorblywende 15 000 poste bly vakant en word ook deur ongekwalifiseerde onderwysers geweier. Dit het die land se slaagsyfers negatief beïnvloed, het Mutasa gesê.
Lazarus Dokora, die minister van onderwys, sport, kuns en kultuur, het gesê die rede vir die tekort aan onderwysers is omdat daar jaarliks 5 000 onderwysers opgelei word maar dat die aantal kinders wat elke jaar skool toe gaan al meer word.
– Volg Nuus24 op Twitter.
- SAPA