Zim het Weste nie nodig, sê Mugabe
2010-07-11 13:52
Die Burger
Harare – Pres. Robert Mugabe het gesê Zimbabwe het nie Westerse hulp nodig om sy ekonomie op die been te bring nie, het die staatsmedia gister berig.
Hy het gereageer op die Europese Unie (EU) se vereistes dat die land vordering maak met politieke hervorming en menseregte.
Lede van Zimbabwe se regering het verlede week teruggekeer van ’n vergadering met die EU om die verhouding te probeer herstel. Die EU het in Februarie sanksies teen Mugabe en sy binnekring hernu.
“Zimbabwe sal met haar eie verstand en hulpbronne regkom,” het Mugabe gesê. “Zimbabwe sal nie deur enige land of organisasie gered word nie, en veral nie deur die Weste nie.”
Hy het Westerse lande ook beskuldig dat hulle druk plaas op die internasionale diamantreguleerder, die Kimberley-proses, om Zimbabwe se diamantuitvoere te keer.
- Volg Nuus24 op Twitter
- Die Burger