Zim-gesondheidsdiens kry hupstoot
2009-11-25 11:42
Harare – Zimbabwe se sukkelende gesondheidsdiens sal US$180 miljoen (R1.3 miljard) van die internasionale hulpagentskap Global Fund ontvang om te help met die stryd teen MIV/Vigs, asook tuberkulose en malaria.
Die Zimbabwiese regering en Global Fund het vroeër vanjaar in Genève, Switserland, 'n ooreenkoms geteken vir die beskikbaarstelling van geld vir dié toelaag.
"Die eerste fase van die toelaag sal in Januarie 2010 begin en tot Desember beskikbaar wees,” het 'n Global Fund woordvoerder, Rangarirai Chiteure, aan die koerant Herald gesê.
Zimbabwe ontvang al van 2002 af geld van Global Fund. Die jongste toelaag is die vierde wat aan dié land toegeken is.
In September vanjaar het Zimbabwe vordering in sy stryd teen MIV/Vigs aangekondig. Die land het gesê die tempo waarteen die infeksie versprei het, het tot 13.7% onder jongmense en volwassenes gedaal van 14.1% die jaar voor dit.
Henry Madzorera, minister van gesondheid, het gesê dié persentasie is steeds te hoog. Hy het ‘n beroep gedoen vir verdere pogings om dit te verlaag.
Zimbabwe is een van die min lande in die wêreld wat ‘n groot afname in MIV-infeksies toon. Die land het in 1999 'n tempo van 33% getoon.
Dié sukses word toegeskryf aan veldtogte deur die regering en internasionale skenkers, asook Zimbabwe se ekonomiese ondergang wat dit moeiliker gemaak het vir mense om meer as een seksuele verhouding te onderhou.
Die land sukkel om vir mense met Vigs te sorg as gevolg van 'n tekort aan antiretrovirale behandeling. Sowat 60 000 mense, slegs 20% van dié wat dit benodig, ontvang dié medikasie.
- Sapa-AFP