Zim daag VSA en die weste uit oor diamantverkope
2011-06-21 13:26
Harare – Zimbabwe het onderneem om besluite oor die internasionale monitering van diamantverkope uit die land se Marange-velde by ‘n vergadering van die internasionale “bloeddiamant”-waghond uit te daag, het die staatsmedia Dinsdag berig.
Obert Mpofu, die minister van mynwese, meen die land moet toegelaat word om waardevolle stene te kan uitvoer sonder om gemonitor te word.
Hy het aangevoer dat Zimbabwe die minimumvereistes van die Kimberley-proses-sertifiseringskema (KPCS) nagekom het
Die KPCS is ’n internasionale ooreenkoms wat konflikdiamante van die mark af probeer hou.
“Zimbabwe het voldoen aan die minimum vereistes van die KPCS en dit is deur die laaste kommissie bevestig,” het Mpofu op die kantlyne van die vergadering in Kinshasha gesê, volgens die Herald-koerant.
“Vertel my van enige land in Afrika wat belê het soos ons in die Marange-omgewing belê het,” het hy gesê.
“Enige ander uitstaande kwessies moet gesien word as werk wat nog aan die gang is, maar dit moenie ons totale reg om diamante uit te voer belemmer nie.”
Mpofu het verder gesê Zimbabwe het vir twee jaar “probeer om alle KPCS-kwessies in die Marange-omgewing reg te stel sonder enige eksterne finansiële bystand.”
Hy het bygevoeg dat “Zimbabwe nie regverdig behandel” word nie.
Die Marange-velde, wat as Afrika se rykste diamant-vonds van die dekade gesien word, is die middelpunt van ‘n jaar se omstredenheid oor vermeende misbruik deur Zimbabwe se president, Robert Mugabe, se weermag.
Volgens monitors het die weermag laat in 2008 beslag gelê op die velde en tienduisende mynwerkers met geweld uitgewerp. Hulle het gevolglik burgerlikes geslaan en verkrag en hulle gedwing om die diamante te ontgin.
Volg Nuus24 op Twitter
- Sapa - AFP