Zim-boere dagvaar 15 presidente van Afrika
2011-04-25 08:16
Johannesburg – Twee Zimbabwiese boere wie se plase afgeneem is, dagvaar 15 Afrika-staatshoofde voor die Suider-Afrikaanse Ontwikkelingsgemeenskap (SAOG) se tribunaal.
Adv. Jeremy Gauntlett SC van Suid-Afrika het die hofstukke namens hulle op ’n dringende grondslag by die SAOG-kantoor in Windhoek, Namibië, ingedien.
Die eerste twee applikante is William Campbell van die Chegutu-distrik in Mashonaland-Wes en sy maatskappy, Mike Campbell.
Die derde applikant is Luke Tembani van die Nyazura-distrik.
Daar is drie verweerders. Die eerste is die presidente van 15 Afrika-lande, onder wie pres. Robert Mugabe.
Die tweede is die ministersraad van die SAOG en die derde die Republiek van Zimbabwe.
Die aansoek hou verband met ’n baie omstrede besluit van die 15 SAOG-staatshoofde in Augustus dat die tribunaal van die SAOG se werk gestaak word sodat die werkwyse van die tribunaal ondersoek kan word.
Die tribunaal is effektief summier ontbind.
Sowel hy as Tembani het reeds – toe die tribunaal nog bestaan het – bevele gekry dat die onteiening van hul grond onregmatig was, maar die Zimbabwiese regering het sonder seremonie aangekondig hy weier om die tribunaal se bevele te erken.
Nou wil Campbell en Tembani verdere stappe voor die tribunaal doen in ag genome die Zimbabwiese regering se houding, maar hulle kan dit weens die opskorting van die tribunaal se werk in Augustus nie doen nie.
Volg Nuus24 op Twitter
- Beeld